Presentouse o libro Orgulho Galego na Diáspora. Conversa con Higino Martins Estêvez
13:13
Xoán Martínez Tamuxe
O martes 29 de xullo levouse a cabo no Concello de Oia a presentación do libro Orgulho Galego na Diáspora. Conversa com Higino Martins Estêvez, dos autores Ângelo Gonçalves Vicente, Licenciado en Ciencias Políticas e Administración e Bernardo Penabade Rei, Licenciado en Filoloxía Galego-Portuguesa. Abriu o acto a alcaldesa de Tomiño, Sandra González, que é á súa vez Vicepresidenta da Fundación Comarcal O Baixo Miño, entidade que editou esta publicación. Alí nos atopamos co alcalde de O Rosal, Jesús María Fernández Portela, co de A Guarda, José Manuel Domínguez Freitas, o concelleiro de Oia e deputado provincial José Antonio Olmedo, a Presidenta da Fundación Comarcal, Carmen Somoza, así como co noso amigo Néstor Estévez Pérez, director da coral polifónica Vagalume de Oia.
Este libro Orgulho Galego na Diáspora. Conversa com Higino Martins Estêvez, leva o limiar de Edelmiro López Iglesias, Director Xeral de Desenvolvemento Rural, consta de 73 páxinas, con ilustracións a cor e en branco e negro. Esta obra é unha extraordinaria aportación á futura biografía do ilustre oiense, o escritor, investigador e profesor Higino Martins Estêvez, residente en Buenos Aires.
Novo libro de Joaquín Miguel Villa Álvarez
03:39
Xoán Martínez Tamuxe
Con motivo do L Aniversario da fundación do Colexio dos PP. Somascos de A Guarda, a organización do dito evento, en colaboración co propio colexio, programou multitude de actividades deportivas e culturais. De todas elas cabe destacar a publicación do libro Colegio PP. Somascos de A Guarda (1957-2007) . 50 años de presencia somasca en España, da autoría de Joaquín Miguel Villa Álvarez, doutor en Historia e profesor dese colexio.
Asistimos como antigo profesor e convidado ao acto da presentación desta obra que se levou a cabo no Salón dos Espellos o pasado día 12 de xullo. Presidiron o acto o alcalde da Guarda, José Manuel Domínguez Freitas, o representante da Comisión do L Aniversario do colexio dos PP. Somascos, Juan Carlos Flores Álvarez, o Pai Vidal, e o propio autor, Joaquín Miguel Villa Álvarez. Esta obra consta de 500 páxinas, ilustradas con fotografías dende a propia creación do centro ata a actualidade. Está dedicada ao P. Orestes Caimotto por ser un dos máis activos directores do colexio.
IV Romaría da Madanela na Pedrada
06:15
Xoán Martínez Tamuxe
O domingo 20 de xullo tivo lugar unha nova romaría no monte da Pedrada na honra de Santa María Madanela. A organización correu a cargo das comunidades de montes de Barrantes e Burgueira, coa colaboración dos correspondentes concellos (Tomiño e Oia). Multitude de fies asistiron á Santa Misa oficiada polo Rvdo. D. Jesús García Villadóniga, párroco da Guarda, axudado por D. Antonio Estévez, parroco de Burgueira. Rematada a misa, ademais dos cregos citados interviron o alcalde de Oia, Alejandro Rodríguez e a alcaldesa de Tomiño, Sandra González. Seguidamente a procesión saíu percorrendo o itinerario de costume, dando a volta ao redor da nova e monumental cruz que alí se erixiu. Durante toda a xornada e baixo unhas carpas alí instaladas, os asistentes disfrutaron dos máis típicos e variados pratos galegos. Nesta ocasión e por vez primeira estivo exposto e á venda o libro Memoria histórica da capela da Madanela no monte da Pedrada e vestixios dunha fortaleza.
Jean-Pierre e Marie-Claude Auffret no Rosal
14:51
Xoán Martínez Tamuxe
Por terceiro ano consecutivo e dende o 2006, acompañamos polo Rosal a Jean-Pierre Auffret e Marie-Claude Auffret, especialistas franceses na arte rupestre para ensinarlles a ubicación dos diferentes gravados existentes na vila para un estudo que están a realizar sobre este tipo de manifestacións en Galicia. Nesta última visita estiveron presentes tamén o arqueólogo Pablo Novoa e o profesor José Luis Galovart. Un paseo polos montes rosaleses que nos levou por exemplo a observar os cruciformes de Parada, o labirinto de Chan do Rei ou os gravados de Laxe do Lapón.